Tńg-lâi Ka-gī(2) Ka-gī Kong-hn̂g

Ka-gī kong-hn̂g le̍k-sú tn̂g

1910 lâi khí hn̂g

Ê-chai thiⁿ-sek bâ-bū-kng

Sàn-pō͘ se̍h-se̍h thiⁿ chiām kng

Ka-gī tē-it tōa ōe-ka

Tân Têng-pho sàng khiā tī chia

Ōe-tô͘ siá-seng 1 thàu-chá

Kong-hn̂g kong-kéng ōe kàu gia̍h

Chhiū-bo̍k koân kah beh tú thiⁿ

Sèⁿ-miā oa̍h-thiàu sek chhiⁿ-chhiⁿ

Ji̍t-pún kè-ōe chin mî-chiⁿ

(M̄-koh lán kàu-té iáu-sī hông si̍t-bîn)

Tâi-oân-lâng tio̍h ài chheng-chhíⁿ

Thiaⁿ-kóng sîn-siā tī hn̂g--ni̍h

Ka khòaⁿ chiah chai chá bô--khì

1994 hit chi̍t nî

Hóe-sio kám sī bô sè-jī?

Tē-piau ōaⁿ-chò Tiong-lia̍t-sû

Kì-liām Tiong-hôa ê chiàn-sū

Ji̍t-pún sîn-siā piàn hóe-hu

Tâi-oân miā-ūn tah bông-bū

Sî-kan ná chìⁿ ba̍k 1  nih

Lán koh ē-tàng chò siáⁿ-mi̍h?

M̄-thang ià-siān kap siong-pi

Pó-sioh bûn-hòa hiān-chhú-sî