228悲歌

228悲歌 圖文/Êng-an

Tī 2024, 2025 228 hit 1 ji̍t, góa tòe Siau Bûn-kiat sian-siⁿ tō-lám thoân-thé khì La̍k-tiuⁿ-lê chèng-tī siū-lān-chiá bōng-hn̂g kiâⁿ-ta̍h. Jīn-bat in hō͘ THBK chèng-hú bû-ko͘ pek-hāi ê kò͘-sū.

Tī 2024, 2025 228彼一日，我tòe蕭文杰先生導覽團體，去六張犁政治受難者墓園行踏。認bat in予中華民國政府無辜迫害ê故事。

N̂g Êng-chhàn sian-siⁿ ê bōng mā tī hia. I tī hit ê khióng-pò͘ ê nî-tāi, chhòng-chok pán-ōe “Khióng-pò͘ ê kiám-cha.” Chit ê chok-phín kā 1947 nî 228 tōa-tô͘-sat ê tāi-chì kóng--chhut-lâi. Chin put-hēng, i tī 1951nî hō͘ THBK chèng-hú lia̍h--khí-lâi, bóe-chhiú tī Bé-tiûⁿ-teng hông chhèng-sat.

黃榮燦先生ê墓mā tī遐。伊tī彼ê恐怖ê年代，創作版畫《恐怖的檢查》。這ê作品kā1947年228大屠殺ê代誌講--出來。真不幸，伊tī1951年予中華民國政府掠--起來，尾手tī馬場町hông槍殺。

N̂g Êng-chhàn sian-siⁿ, góa siūⁿ-beh hiàn pek-ha̍p-hoe hō͘--lí, to-siā lí ióng-kám kō͘ chhòng-chok, kā lí chhin-ba̍k-chiu khòaⁿ tio̍h ê 228 kóng--chhut-lâi.

黃榮燦先生，我想欲獻百合花予你，多謝你勇敢kō͘創作，kā你親目睭看tio̍h ê228講--出來。

Chù-kái

Chit pak tô͘ tiong-ng ōe-bīn, to̍h sī ná khòaⁿ “Khióng-pò͘ ê kiám-cha” ná ōe--chhut-lâi-ê.

註解

這幅圖中央畫面，to̍h是ná看《恐怖的檢查》，ná畫--出來ê。

歡迎download，放送hō͘較chē人，認bat228ê歷史https://drive.google.com/drive/folders/1GjY1Etnenzpbnh5E3-n0NQ-nH74qWe3z?usp=drive_link