“Cháu-thiàu Jîn-seng” sī 1 ê chin súi-khùi ê ián-chhut chok-phín. Tī Ji̍t-pún sek ê kó͘-chek lāi-té ián-chhut, koh ke-thiⁿ le̍k-sú khì-bī.
Chok-phín kā si kap kak-sek, kō͘ bú-tō, hí-kio̍k chhiú-lō͘ têng-hiān--chhut-lâi.
Siōng bóe pha kā si pian chò koa-khek, chêng-kám-tek ke-thiⁿ le̍k-liōng.
Piáu-ián-chiá chheng pe̍h saⁿ, hō͘ koan-chiòng koh-khah chù-sîn teh khòaⁿ in ê piáu-chêng kap tōng-chok.
Kō͘ tn̂g-tn̂g ê tòa-á lâi kiông-tiāu lâng chi-kan ê koan-hē, chhiong-tu̍t, hô-hâi, phòa-chhùi……4 ê piáu-ián chiá, tián-hiān bô kâng kò-sèng, nî-kí, kak-sek……Tī sè-sè-keng-á ê kó͘-chek--ni̍h ián-chhut, ián jîn-seng chhun-hā-chhiu-tang, lāu-jia̍t koh che̍k-bo̍k.
Ián-chhut kā bûn-ha̍k ê cheng-sîn koh-khah ka-kiông. Siáu-liân piáu-ián-chiá kā Tâi-gí tâi-sû liān kah put-chí liú-lia̍h. Hiâu-hēng kah, in ha̍k-sip kap seng-oa̍h khoân-kéng, Tiong-gí chá tio̍h chiâⁿ chò kiông-sè gí-giân, Tâi-gí piàn chò sī-tōa-lâng teh kóng, iah-sī chhài-chhī-á chiah ke-kiám thiaⁿ ē tio̍h ê gí-giân.
Chit ê chōng-hóng chi hā, Tâi-gí iû-goân sī piáu-ián-hòa, m̄-sī seng-oa̍h-hòa. Chóng--sī, ē-tàng him-sióng súi-khùi ê Tâi-gí ián-chhut, mā sī kám-kak chin giang, chin kám-tong. Kan-na koh khah thê-chhíⁿ ka-tī, put-sam-sî, tio̍h ài pá-ak ki-hōe, kap lâng, kóng Tâi-gí.
Comments