20251101舞蹈和詩歌。咱做伙來數念陳雷先

To-siā落/làu台語-瑞士ê台語社A-koan tàu hip-siōng kap lio̍k-iáⁿ.

多謝落/làu台語-瑞士ê台語社A-koan鬥翕相kap錄影。

Chòe-āu ê kam-chià-hn̂g ōe-thâu si, Thiⁿ-kng. Goe̍h-khîm sai Tiuⁿ Ngá-sûn ka pian chò liām-koa. Bú-chiá Êng-an kō͘ tong-tāi-bú piáu-ta̍t ōe-bīn. Thiⁿ-kng lāi-té siá chhut chú-kak Gio̍k-lân ê sin-sè kap bô͘-iūⁿ, chin oa̍h-thiàu. 2023 tī Tân Lûi Tâi-oân Bûn-ha̍k Cheh thâu pái hoat-piáu, Tân Lûi sian tī hiān-tiûⁿ hō͘ gún chin tōa kó͘-lē. 2025 11 goe̍h chhoe-it, kám-siā iú-chì iau-chhiáⁿ, koh thiàu Thiⁿ-kng. Tân Lûi sian tiāⁿ-tio̍h tī Thiⁿ-téng mā teh him-sióng.

Tē jī siú koa Hái-iûⁿ Hiō-tāi, Ngá-sûn chok-sû, chok-khek. Chhiùⁿ chhut lán Tâi-oân-lâng cheng-sîn ì-chì. Lán sī hái-iûⁿ hiō-tāi, m̄-sī 炎黃子孫.

Beh kap Tân-lûi sian kóng kúi-kù-á ōe.

Kap chē-chē iú-chì, chiân-pòe chòe-hóe siàu-liām, chá-khí kap ē-po͘ ê hoa̍t-tōng, lâng kheh-kheh-kheh. Kóng tio̍h lí, ū--ê ba̍k-sái kâm ba̍k-kîⁿ, góa mā kâng-khoán, m̄-kam lí lî-khui gún. Thiaⁿ chē-chē chiân-pòe kóng lí án-nóa chò Tâi-bûn ūn-tōng, án-nóa kian-sim siá-chok… Tâi-oân lō͘ hiah-nī sin-khó͘, 1 lō͘ koh ē hông ap-pek, sī án-nóa beh soán-te̍k chit tiâu kan-khó͘ lō͘? Tha̍k lí ê chok-phín, m̄-koán siáu-soat, kio̍k-pún, si, ia̍h-sī phêng-lūn, hō͘ gún chi̍t-si-á ǹg-bāng. Kám-siū lí ê cheng-sîn ì-chì. Gún bē ko͘-toaⁿ, to-siā lí kā góa ín-chhōa, kè-siok kiâⁿ Tâi-bûn lō͘, chhòng-chok lō͘.

~~

最後ê甘蔗園話頭詩，天光。月琴師張雅淳ka編做唸歌。舞者Êng-an kō͘ 當代舞表達畫面。天光lāi-té寫出主角玉蘭ê身世kap模樣，chin活跳。2023tī陳雷Tâi-oân文學節頭擺發表，陳雷先tī現場hō͘阮真大鼓勵。202511月初一， 感謝友志邀請，koh跳天光。陳雷先tiāⁿ-tio̍h tī天頂mā teh欣賞。

第二首歌海洋後代，雅淳作詞，作曲。唱出咱台灣人精神意志。咱是海洋後代，m̄-sī炎黃子孫。

欲kap陳雷仙講幾句á話。

Kap濟濟友志，前輩做夥數念，早起kap下晡ê活動，人kheh-kheh-kheh。講tio̍h你，有--ê目屎含目墘，我mā仝款，毋甘你離開阮。聽濟濟前輩講你án-nóa做台文運動，án-nóa堅心寫作... 台灣路遐爾辛苦，一路koh會hông壓迫，是án-nóa欲選擇這條艱苦路？讀你ê作品，毋管小說，劇本，詩，ia̍h-sī評論，hō͘阮一絲á向望。感受你ê精神意志. Gún袂孤單，多謝你kā阮引chhōa，繼續行台文路，創作路。