阮ê kha跡~蘇澳海岸
- Satsangdance 靚舞集
- Jul 18
- 2 min read
攝影|Tân Lō͘ 舞蹈|Êng-an
Gún sái chhia, seng keng-kòe So͘-ò͘ hî-káng, kè-sio̍k tńg-oan se̍h kak chiah lâi kàu hái-hōaⁿ. Chia ê hái-hōaⁿ kap Tām-chúi Soa-lūn bô-kâng. Chio̍h-thâu sì-sòaⁿ, tōa-lia̍p sè-lia̍p, 1 phìⁿ 1 phìⁿ. Gún ioh kóng sī ùi téng-koân chio̍h-piah lak--lo̍h-lâi-ê. Khêng-si̍t put-chí-á gûi-hiám, nā pháiⁿ-thiⁿ to̍h m̄-thang lâi chia kiâⁿ-ta̍h.
阮駛車，先經過蘇澳漁港，繼續轉彎se̍h角才來到海岸。Chia ê海岸kap淡水沙崙無仝。石頭四散，大粒細粒，1片1片。阮臆講是ùi頂懸石壁落--落來ê。窮實不止仔危險，nā歹天to̍h m̄-thang來chia行踏。
Ji̍p-kháu liâng-têng lāi, 1 tīn lāu-hòe-á ná khòaⁿ hái ná phò-tāu, chim-chiok thiaⁿ, in teh kóng goân-chū-bîn gí kap Tâi-gí. Kóng kah hiah khin-sang chū-jiân, hiah-nī hó-thiaⁿ.
入口涼亭內，1陣老歲仔ná看海ná破豆，斟酌聽，in teh講原住民語kap台語。講kah hiah輕鬆自然，hiah-nī好聽。
Ji̍t-thâu chin iām, bú-tō iáu-bōe khí-kó͘ to̍h kui-sin-khu kōaⁿ--ah. Hái-hōaⁿ ū 1 kóa chhiū-ki ta khì--ah, gún kā chhiú-ki tòng-chò pōe-kéng, bú-tō ùi chia khí-kó͘. Nâ-sek ní pò͘ chhiūⁿ hái-éng, mā-sī hái-hong. Ná thiàu-bú ná kám-siū hong ùi tó-ūi lâi? Pò͘, ū-sî sūn-hong poe koân-koân, ū-sî sûi--lo̍h-lâi, khàm tī góa sin-khu téng. Khí-khí lo̍h-lo̍h, che sī hái-éng ê bú-tō.
日頭真炎，舞蹈猶未起鼓to̍h規身軀汗--ah。海岸有1寡樹枝乾去--ah，阮kā樹枝當做背景，舞蹈ùi遮起鼓。藍色染布像海湧，mā-sī海風。Ná跳舞ná感受風ùi佗位來？布，有時順風飛懸懸，有時垂--落來，khàm tī我身軀頂。起起落落，這是海湧ê舞蹈。
Hioh-chhoán--1-ē, góa mā chē lo̍h-lâi khòaⁿ hái. Tōa-hái hiah-nī gûi-hiám, koh hiah-nī súi. To͘-chhī tòa kú, soah bē-kì-tit ài án-ne khòaⁿ hái. Kan-taⁿ chē--leh, thiaⁿ tōa-hái chhiùⁿ koa, koa-siaⁿ chǹg ji̍p sim-koaⁿ té, éng-oán ē-kì--tit.
歇喘--1下，我mā坐落來看海，大海hiah-nī危險，koh hiah-nī媠。都市tòa久，soah袂記得án-nóa欣賞海。Kan-taⁿ坐--leh，聽大海唱歌，歌聲鑽入心肝底，永遠會記--得。
Comments