Chū chai-iáⁿ ū pe̍h-ōe-jī su-siá hē-thóng kàu-taⁿ, ta̍k-pái ín-chhōa ūn-tōng khò-têng chìn-chêng, góa ē kō͘ pe̍h-ōe-jī chò tōng-chok pit-kì. Chhiú siá kap ōe, án-ne ê hong-sek, chin ū kám-chêng, ìn-siōng mā khah chhim.
自知影有白話字書寫系統到今，逐pái引chhōa運動課程進前，我會kō͘白話字做動作筆記。手寫kap畫，án-ne ê方式，真有感情，印象mā較深。
Ín-chhōa ta̍k-ke chhun-ûn kap ūn-tōng, kō͘ góa só͘ bat ê tâi-gí sû lâi kóng. Sui-bóng hiān-chhú-sî iáu bô-hoat-tō͘ chò kàu choân tâi-gí, m̄-koh góa ē kè-sio̍k chhōe sek-ha̍p ê sû lâi ín-chhōa.
引chhōa逐家伸ûn kap運動，kō͘我所bat ê台語詞lâi講。雖bóng現此時iáu無法度做到全台語，毋過我會繼續chhōe適合ê詞lâi引chhōa。
Ta̍k-pái siūⁿ--tio̍h tâi-bûn chiân-pòe kap iú-chì, tāi-ke tī bô-kâng léng-he̍k phah-piàⁿ, tio̍h hō͘ góa kèng-ka ū khùi-la̍t, kè-sio̍k ha̍k-si̍p Tâi-gí kap Tâi-bûn.
逐pái想--tio̍h台文前輩kap友志，大家tī無kâng領域phah拚，tio̍h予我kèng-ka有氣力，繼續學習台語kap台文。
Comments